Participamos na Semana da Ciencia

As nenas e nenos de 1º EP tamén participamos na Semana da ciencia cun traballo sobre o efecto invernadoiro. Investigamos a composición da atmósfera e os gases de efecto invernadoiro, tamén reflexionamos sobre as accións que realizabamos que deterioraban a atmosfera e polo tanto ao noso planeta. E, o máis importante, pensamos que cousas podiamos facer para conservar o planeta.
Para entender o efecto invernadoiro sobre os seres vivos realizamos un experimento con dúas plantas e unha caixa de plástico.

   

Anotamos a temperatura dentro e fóra da caixa cada dous minutos, durante 14 minutos. A inicial era de 20ºC nos dous casos. Mentres que fóra a temperatura non variou, dentro subiu ate os 29ºC.

O máis emocionante foi expoñer o noso traballo ás compañeiras e compañeiros do cole e escoitar as explicacións que nos daban eles.

 

 Moi interesante!!!

Nuria e os caracois

Ola a todos e todas!
 A Clase dos Dinosaurios queremos compartir con vós as imaxes da visita de Nuria, a mamá de Antía, que colaborou connosco no Proxecto dos Caracois que actualmente estamos a levar a cabo. Coma todas as visitas de pais e nais, foi moi interesante e especial... e aprendemos moitííísimo xa que veu moi moi preparada e como di Antía: "A miña  sabe moooooito  de animais"!!! 

Nós xa sabiamos unhas cantas cousiñas sobre os caracois: que non teñen ósos, que son hervíboros, algunhas partes do seu corpo e para que serven... pero agora somos grandes expertos en caracois! Veredes..
Os caracois teñen: pulmón, corazón, pé (para andar, claro!), cabeza, tentáculos (nos longos están os seus ollos e os curtos son os seus brazos e nariz!), e tamén teñen aparello reprodutor aínda que un tanto especial porque son hermafroditas... menuda palabra! Menos mal que estivemos moi atentos e vos podemos explicar o que significa: pois quere dicir que cada un deles é macho e femia ao mesmo tempo!!!
E para poder comprender mellor todo isto que Nuria nos contaba axudounos moito unha maqueta dun caracol enoooorme no que puidemos ver en tamaño máis grande que ao natural o que estabamos a descubrir.

A ver a ver... pregunta! Os caracois teñen dentes? Vós que pensades? Pois sí, pero o que máis nos abraiou foi onde teñen os dentes, na lingua!!! A verdade é que son uns animais moi pequechiños pero están cheeeeos de sorpresas.

Estades a ver caracois neste tempo? A que non? É que nesta época do ano xa non podemos ver caracois porque hibernan, é dicir, métense na súa cuncha ata que fai menos frío e chove, que é o que a eles lles gusta (sen estar húmidos non poderían vivir), e cada vez que saen da hibernación e comen medran un pouquiño, é por isto que podemos ver nas súas cunchas varias raias de cores distintas, cada unha correspóndelle a unha hibernación! Nuria contou ao longo da súa visita coa inestimable colaboración de Antía, aquí vos amosamos o ben que nos explicaban como medra a cuncha...

Como vedes os caracois están cheos de curiosidades e nós gozamos moitísimo descubríndoas con Nuria. Dende aquí darlle mil grazas por conseguir que aprendesemos moitísimo ao tempo que  nos divertimos!!!

Estas son algunhas das cousiñas que aprendemos sobre estes animais e se queredes ver que máis fixemos nós e algúns compañeiros e compañeiras do cole animámosvos a que veñades á exposición que presentaremos no Auditorio Gustavo Freire o 16 de decembro e que complementa un Gran Concerto en homenaxe ao escritor Manuel María... e sí, como ben imaxinades nós traballamos un poema sobre os caracois!
 Biquiños enoooormes da Clase dos Dinosaurios!

Video Oficial

AQUÍ podedes ver o videoclip oficial, o resultado dun fermosos traballo ideado, creado, dirixido, escrito, soñado .... polos rapaces e rapazas de 3º ESO e no que participamos todos os nenos e nenas de Galén.
Grazas!!!

Estrea....de CINE!!!

Siiii, hoxe foi a grande estrea do videoclip no que levamos a traballar con moito cariño e esforzo no cole dende hai xa algún tempo. E foi unha estrea de verdade, en pantalla grande.
Si, si, esta mañá todos os nenos e nenas de Galén fomos aos Multicines Centro á estrea do videoclip "Lávate las manos" que os rapaces e rapazas de 3º ESO crearon, escribiron, dirixiron, cantaron.... e no que tivemos a sorte de participar. Xa vos falaramos deste proxecto aquí recordades????
 Pois foi unha mañá moi moi especial e gustounos moitísimo sentirnos portagonistas unha vez máis de cousas tan grandes.
 E aquí tedes algúns enlaces da repercusión do noso traballo en diferentes medios...... e seguiremos contando seguro que si!
 No telediario da primeira das 21 a partir do minuto 5
 No telexornal da RTVE Na TVG
E tamén na prensa:
 El Progreso
La Voz de Galicia

Visita papá de Aldán e....PEIXEEEEEES!!!

Xa temos peeeeeixessss!!!! Estamos moi pero que moi ilusionados cos nosos novos compañeiros e compañeiras de aula, e é que a espera foi un pouco longa porque para que o ecosistema estivese axeitado para os seus novos habitantes tiñamos que esperar un pouco e...claro!!! para nós a espera foi eterna. Estas e outras cousiñas nos veu a contar o papá de Aldán, Jaime, que ademais foi o que trouxo os primeiros peixes....e é que el sabe moito de peixes e quixo compartilo con nós a semana pasada unha tardiña. Pirmeiro limpamos un pouco o cristal do acuario porque de darlle moito a luz directa que entraba pola fiestra estaban a aparecer alguiñas. Así que limpamos con un imán e pareceunos ata un pouco máxico, e ademais puxemos unhas cartolinas para que non entre a luz directamente. Despois estivemos tocando e mirando as plantas acuáticas que Jaime trouxo para os peixes, porque... sabedes? aos peixiños gústalles moito agocharse entre as folliñas. Tamén vimos un termómetro aínda que nos costou adiviñar o que e para que servía xa que os peixes non tiñan febre non???!!! Claro é para controlar a temperatura da auga: entre 20 e 25 ºC. E para que nós o poidamos controlar mellor o termómetro ten unha marquila verde que temos que vixiar cada día. E o último e moi importante...que comen? Pois comida de peixes!! que temos que darlles cada día os encargados/as pero con coidado de non empachalos. Por certo....comprobamos que a comida de peixes cheira moito pero que a eles lles gusta igualmente. E despois de taaaantas cousiñas interesantísimas chegou o momento máis esperado: os peeeeeeeixessssss!! Moi a modiño fomos meténdoos na auga para que se afixesen á súa nova casiña. Son GUPIS machos e femias e distínguense polas cores....e temos moitísimos!!! Estamos encantados cos noso animaliños e coas nosas novas responsabilidades no seu coidado. Grazas Jaime pola túa colaboración pasámolo moi pero que moi ben e aprendemos un montón de cousiñas.

Actores e actrices.

Seguro que algúns de vós xa nos vistes estes días no cole....cámaras de televisión, micros, grúas polo patio..... e é que todo o cole estamos inmersos no proceso de gravación dun videoclip sobre o lavado de mans que formará parte dunha campaña que o Ministerio de Sanidade está a preparar para conmemorar o 5 de maio o Día Internacional do Lavado de mans.

Son os rapaces e rapazas de 3º de ESO os que crearon a idea do video, os contidos, escenas, a letra da canción... e agora os encargados/as de produción xunto cos profesionais da Fundación Tic que nos apoian na parte máis técnica.
Onte gravamos as escenas de exterior na que colaboramos todo o centro e hoxe pola mañá fixemos a nosa pequeniña escena na aula de 1º EI. Foi toda unha experiencia: rodeados de cámaras, claquetas, palabras como "Acción" ou "prevenidos" que nos chamaron tremendamente a atención e sentímonos por uns instantes como verdadeiros actores e actrices.

Deixámosvos aquí algunhas imaxes do momento.

Semana da Auga

si, si, tamén celebramos no cole a Semana da Auga que iniciamos o pasado luns 19 de marzo e rematamos o venres 23.
Tratábase dun proxecto internivelar no que estabamos implicados todos os cursos do cole dende 3 anos ata os grandes de 1º de bacharelato, e todos e todas en torno ao tema da auga.
Nas aulas de infantil esta actividade conectou directamente co proxecto iniciado en Nadal xunto a Pedro e a ONG Rebibir que podedes recordar aquí

E empezamos con marcha, moita marcha no corpo para participar o luns na "Carreira solidaria da auga" en colaboración con UNICEF co obxectivo de racadar fondos para a construción de pozos en Níxer, un proxecto que leva por título Gotas para Níxer. Podedes ver máis información sobre este proxecto aquí
E nós, con toda a nosa enerxía, acadamos os obxectivos propostos e a carreira foi todo un éxito.


E nas aulas iniciamos un proxecto de investigación en toda infantil ao redor dos ecosistemas acuáticos e algúns dos seus habitantes.

Na clase do sol están a montar un acuario de auga doce. E este foi o proceso:

Lavamos o acuario e a area do fondo



Despois de ben limpiño meter a area dentro


A auga e as pedras


E agora a esperar uns días a que o ecosistema se asente, se limpe e quente a auguiña para poder traer aos peixiños....ainsss cantas ganas de telos con nós e poder observar e investigar.
Xa vos iremos contando....


Os nenos e nenas da clase dos tigres escollemos as tartarugas de florida e temos unha na aula que ademais de para observar nos axuda tamén a ir asumindo algunha responsabilidade máis para o seu coidado, limpeza, darlle de comer etc.... e iniciamos o proxecto da auga con ela.
Aquí nos vedes dándolle de comer

Fixemos tartarugas de plastilina


E tamén iniciamos un proxecto de investigación que, xunto coa observación directa do animaliño, nos axudou a respostar a moitas das preguntas que nos plantexamos sobre ela.
Coas conclusións sacadas fixemos o mural que despois compartimos na exposición coxunta de todo o cole.


E tivemos tamén a colaboración especial da mamá de Valeria, que quixo compartir con nós a canción e video de "La tortuga Manuelita" que trouxo dende Arxentina, o seu país de orixe. Compartimos unha tarde moi especial con ela, grazas Mariana!!


Os golfiños quixemos centrarnos nos animais das charcas e pozas.
Un día apareceu Catuxa con animais dunha poza: unha xa coñecida a ra pero había tamén outros que non sabiamos o que eran. Pensabamos que eran cágados, bebés ras, e buscando buscando e comparando coas imaxes da información que rápidamente aportamos dende as nosas casas descubrimos que era outro animal diferente....uns bebés tamén pero de Tritón. Moitos de nós non sabiamos da existencia deste anfibio e a motivación está a ser máxima para descubrir moito máis sobre eles.



O primeiro que tiñamos que descubrir era como coidalos: como manter o seu hábitat e como alimentalos......e xa vedes na foto, rápido nos organizamos para a caza de insectos e miñocas no patio.


E seguimos a observar e investigar.

Nas tres aulas elaboramos uns murais sobre o que estabamos a facer para compartir cos outros nenos e nenas do cole e as familias xa que o xoves viñeron a un acto no que un representante de cada aula explicaba o proxecto e/ou experimento que escolleran sobre a auga. E ás familias encantoulles claro! grazas pola vosa participación.

Iniciamos os proxectos nesta semana pero continuaremos ao longo de moitos días máis porque a nosa motivación é máxima. xa vos seguiremos contando.

Proxecto Rebibir-proxecto África

A visita de Pedro serviunos como motivación para iniciar un proxecto de traballo que finalmente titulamos ÁFRICA, e foi punto de saída para moitísimas actividades que se nos foron ocorrendo.

Os nenos e nenas da clase dos Golfiños utilizamos as imaxes que Pedro nos deixou para traballar a descrición do que na imaxe se vía. Para facelo cada un de nós recurríu non só ao que se vía na imaxe, tamén fomos utilizando o aprendido nas nosas procuras de información ou o escoitado a Pedro e mesmo inventamos algunha historia fantástica a partir delas. Encantounos miralas e remiralas, buscarlles as similitudes e diferenzas das persoas que aparecían nelas con nós mesmos, imaxinarnos os seus sentimentos, poñernos na súa pel e indagar acerca do que nas súas miradas se podía ler.





Todo os cole se implicou neste proxecto de colaboración. En todas as aulas se traballou o tema e os grandes fixeron traballos xeniais que a nós tamén nos axudaron a comprender un pouco mellor todo o traballo que Rebibir fai en Mauritania e a podernos achegar a outras realidades sociais, culturais e económicas ben diferentes ás nosas.

Os rapaces e rapazas de 2º ESO viñeron polas aulas de Infantil a contarnos todo o que eles investigaron, e o fixeron de marabilla. Souberon explicárnolo adaptando o seu discurso para que os entenderamos e trouxeron moi acertadamente imaxes coas que poder facelo máis comprensible para nós.
Grazas! encántanos poder contar coa vosa colaboración e presenza nas nosas aulas.
Xa vedes que no cole que facemos un montón de cousas compartidas entre os nenos e nenas de diferentes niveis xa que cremos que é moi moi positivo para ámbalas dúas partes e fomenta o traballo cooperativo e a colaboración entre todos os menbros da comunidade educativa.




Tamén fixeron esta maqueta coa que puidemos entender un pouco mellor como se constrúen os pozos, de onde sacan a auga (pero se é un deserto!) e como as "Culleriñas da lúa" (placas solares) fan que a auga poida saír do máis fondo da terra.



Inspirádonos nos hortos ecolóxicos que poñen en marcha en Mauritania, fixemos unhas postais-doazón con diferentes técnicas plásticas para que o día que as familias viñesen ao cole puidesemos recadar fondos para o proxecto Rebibir. Quedáronnos moi chulas e foi un exitazo. Grazas a todos e todas pola colaboración!



África tamén nos servíu de inspiración para as postais de felicitación ás nosas familias. Os nenos e nenas da clase do sol e dos tigres utilizamos a pel de diferentes animais da sabana para adornar as postais, e quedaron unhas estampacións xeniais das peles da xirafa, do tigre e da cebra. Os golfiños inspirámonos nos estampados das teas que levan as mulleres paara cubrirse e que tamén utilizan para cubrir os cultivos e evitar así que os queime o sol.





E tamén os grandes se encargaron de decorar a entrada do cole. Recrearon unha imaxe que aparece no libro de Rebibir con papeis, telas e diferentes materiais que lle deron texturas e volumes á que lle engadiron aos tres reis magos traballando na horta plantando ravos (reais que plantaron os nenos de 3º e 4º EP). E quedou así de bonito:


Estes que vos contamos son só uns poucos exemplos do que se traballou nas diferentes aulas. E poñemos estas porque son as que máis nos axudaron aos máis pequechos, pero houbo moito e moi bo traballo ao redor deste proxecto tan interesante.

Quédannos moitas cousiñas que contarvos destes últimos días, non deixedes de visitarnos entre festa e festa. Seguimos informandoooooo!!!

Visita dende Mauritania

Nin máis nin menos que dende Mauritania veu Pedro a contarnos un conto no que o sol e a lúa atoparon xuntos un sistema para sacar auga do profundo da terra grazas a unhas "culleriñas máxicas" que funcionan cos raíños do sol (placas de enerxía solar)



Pedro, ataviado co seu traxe e pano na cabeza para protexerse do Sol contounos como el e os seus compañeiros e compañeiras da ONG " Rebibir" colaboran coa xente de aldeas de Mauritania construíndo pozos cos que grazas á enerxía so sol poder sacar auga e regar os hortos nos que colleitan verduriñas como as que nós temos no noso horto do cole: rábanos, cabazas, patacas, pementos etc...


A nós sorpendeunos moito a súa vestimenta e fixemos unha chea de preguntas que asaltaron as nosas cabeciñas ao ver as fotos que Pedro nos trouxo e escoitar a fermosa historia de cooperación.
Curisidades como:
-por que comen coas mans e todos dun mesmo prato?



-cantos kilómetros hai ata o teu país. Cantos días tradariamos. En que viaxaches?
-Por que non levan zapatos?
-Son todos negros???
-para que tapan as prantas dos hortos?
-por que se tapan as mulleres?
-teñen xoguetes?
-por que só se encargan as mulleres dos hortos? que fan os homes?


etc.................

A verdade é que pasamos unha tardiña moi entrañable, e estamos moi moi moivados cara o tema. Grazas Pedro pola túa compaña e pola historia bonita que nos contache. Queremos que leves contigo a Mauritania unha chea de bicos e apertas dos nenos e nenas de Infantil. MUAKSSSSS!!!


Con esta visita iniciamos o proxecto de colaboración do centro con esta ONG xa que todas as etapas teñen previstas actividades nesta liña. Invitámosvos a que visitedes a súa web para coñecer un pouco máis o proxecto: Rebibir
En Infantil esta foi a motivación de cara a iniciar un proxecto ao redor de "África" que desenvolveremos ao longo deste mes con moitas outras actividades que nos vaian xurdindo e que probablemente retomemos á volta das vacacións. Xa sabedes o que poden dar de si os proxectos verdade??? Xa vos iremos contando.