Chegou o Nadal.

Chegou o inverno e con el o frío e....as festas de Nadal!!

Para rematar o trimestre estivemos a preparar as bolsiñas nas que levar os traballiños á casa. Como xa sabedes, gústanos facer todo con material de refugallo e poder así reducir resíduos. Nesta ocasión quixemos darlle unha segunda vida a esas camisetas xa algo velliñas que andan polos armarios das mamás e dos papás. Un pouco de tinte e imaxinación fan delas unhas bolsas do máis chulis.

 Tamén na mesma liña facemos cada ano un xoguete ou xogo sen necesidade de mercar nada.

Este ano os protagonistas foron os tubos de papel hixiénico. Con eles os nenos e nenas da clase dos caracois fixemos este xogo matemático no que se tratar de asociar cada grafía coa súa cantidade (de pauiños). Na clase dos dinosaurios  fixemos catalexos e prismáticos. Chulos, non si?  

Os últimos días do cole foron tamén moi especiais: o chocolate con churros, a elaboración de postais para meter por debaixo das portas dos compañeiros e compañeiras, os cantos de aguinaldo e como non.....A VISITA DO APALPADOR E OS REIS MAGOS DE ORIENTE!!! 

Adornos para a  árbore e postais

  

 Enchendo as barriguiñas para que o Apalpador mire como estamos de mantidos  

 Así...así esteades todo o ano.... dixo o Apalpabarrigas que veu no coche de liña dende as montañas do Courel como cada ano a visitarnos.

  

 As súas Maxestades....

Este fin de trimestre ademais foi un chisco máis especial pois como sabedes fixemos o espectáculo "Andando a Terra" con Uxía Senlle no escenario do Auditorio Gustavo Freire.

Os profesionais do audiovisual están a traballar a reo para que pronto poidamos ver as fotos e a gravación do espectáculo. 

Mentres tanto...que gocedes das vacacións e que teñades un bo Nadal e unha fantástica entrada do novo ano.

Biquiños!!!

Así foi o Nadal 2013, 1ª parte.

Como xa vos contamos este Nadal foi, coma sempre , do máis activo e emocionante. Os nenos e nenas de infantil e primeiro ciclo de primaria cantamos, bailamos,  fixemos adornos, preparamos os nosos traballiños do trimestre para levar a casa, e vivimos unha chea de emocións coas sorpresas que cada ano nos traen estas datas.

Queremos irvos contando por partes, así que estade atentos e  antentas ao longo destas vacacións ao blog que iremos colgando as difrentes aventuriñas.

Hoxe queremos amosarvos algunha cousiña da  parte plástica.

Cada Nadal facemos varias postais para felicitar ás nosas familias, aos nosos compañeiros e compañeiras, e  ao persoal de cociña e administración (este ano non está Ana que acaba de ter un bebé e fixémoslla a Lola). 

Empregamos para todas as postais e adornos dos corredores material de refugallo. Como este ano o proxecto solidario no que participamos xiraba en torno á recollida de alimentos, acordamos utilizar materias relacionados con este tema. A verdade é que cada ano lle atopamos máis posibilidades ao segundo uso dos materiais.

Os nenos e nenas da clase das Bolboretas (1º ei) utilizamos café, azucre, lentellas e papel das ofertas para facer estas boliñas de nadal na súa postal. Na clase das arañas fixemos dous modelos de árbores de nadal con papeis das ofertas do súper e as Águias empregaron o mesmo papel enrrugado para facer estas boliñas

 con maís volume.

    A Macu, Cristina e Néstor fíxolles moita ilusión recibir a nosa postal, mirade,mirade: 

 Os nenos e nenas de 1º de primaria tamén recreamos unha árbore empregando roliños de papel das ofertas e de base unhas tarxetas de publicidade con este azul tan bonito  

 E 2º Ep utilizamos as blondas de adornar os platos e outros materias de refugallo que cada un fomos aportando dende as nosas casas para un modelo e fixemos tamén unnha árbore de nadal para a outra postal de intercambio cos compis.

Ademais da arte máis artística, despois cada un de nós escrebe a mensaxe por detrás.
Hai un momento no venres que é moi moi especial: o intercambio de postais entre diferentes aulas, no que participan todos os rapaces e rapazas do cole dende 3 anos ata 2º de bac. É do máis emocionante xa que se trata de ir á porta das aulas moi moi amodiño para que non se decaten da nosa presenza, metelas por debaixo da porta e ...petar con forza nela para saír correndo e ninguén nos vexa. É un momento xenial!!! Como tamén xenial é  estar na aula e ir recibindo as postais co noso nome!!

Os nenos e nenas da clase das Águias escribimos unha postal máis este ano; unha postal moi especial para respostar á que recibimos do noso amigo Samuel que vive en Verín e segue a acordarse moito de nós...e nós
  del.

 
Os nenos e nenas de EI facemos tamén as nosas bolsiñas para levar os traballos á casa. En 1º EI reutilizando retallos de teas e en 2º e 3º ei este ano reconvertimos camisetas en bolsiñas despois de darlles sun toque de cor. Mirade como as tinguimos:

Tamén quixemos inspirar a nosa decoración da entrada no tema do proxecto solidario no que como xa vos contamos s colaboramos coa Asociación de veciños, comerciantes e industriais da Milagrosa na recollida de roupa, alimentos e xoguetes.

De aí que decidiramos poñer aos nosos reis magos (inspirados no artista Giuseppe Acimboldo) traendo alimentos a Lugo, coa nosa prezada Mosquera. A muralla fixémola con caixas de cartón e cubrímola con pedriñas feitas cos folletos das ofertas do súper.

O collage de fondo tamén está feito co mesmo material polos nenos e nenas máis maiores.

E grazas á colaboración de todos e todas  moitas familias este Nadal estarán un chisco máis fellices. Moitas grazas!!

Xa como colofón final desta longuísima entrada queremos amosarvos os xoguetes que en infantil fixemos a partir de cousas que inicialmente iban ao lixo: Os Robots de 1º ei, os coches de 2º ei e os Tres en LIña de 3º EI.
Quedaron tan chulos que entendimos e compartimos a creenza de que non é preciso mercar cousas para
 poder xogar.

 Pois isto é todo por hoxe. Seguide con atención as novas!!! ahi moito que conatr!

Creatividade a moreas!!

Se na entrada anterior falabamos do inicio do proxecto musical, agora queremos amosarvos algunhas das nosas creacións plásticas destas datas.

Por unha banda, como final do trimestre, preparamos nas tres aulas as bolsiñas nas que transportar os nosos traballiños. E como xa sabedes que para nós é fundamental  o principio da reutilización e redución de resíduos este ano decidimos utilizar en 1º e 2º EI sabas que xa non usabamos nas casas e en 3º EI camisetas das mamás e/ou papás. Dende aquí queremos darvos as grazas a todas as familias que sempre estades moi dispostas a colaborar tamén nesta parte de búsqueda na casa.

Este era o material inicial do que partir para,  con un toque máxico, reconvertilo en bolsiñas fantásticas nas que cada trimestre meter os traballiños, e cando rematen esta función inicial as poidamos utilizar no día a día (para levar a merenda, o pixama de fin de semana etc.....!!! unha chea de usos que lles podemos dar.

Na clase das sereas e das fadas o toque máxico foi o tinguido.

 

E os leóns enfeitamos as teas cos estampados das nosas mans.

 Como xa é habitual, por esas datas o cole sempre participa nalgún proxecto solidario. Este ano colaboramos co Banco de Alimentos de Lugo.
Os rapaces e rapazas de 2º ESO foron os encargados de vir a contarnos a súa experiencia no mesmo un día de reparto pola tarde axudando e da visita ao cole da fundadora do mesmo. Viñeron ás nosas aulas despois a contarnos o que viviran e como podiamos colaborar, así que ademais de aportar comida elaboramos unha postais donativo para a recolllida de fondos cos que mercar alimentos, inspiradas no tema: unha cestiña feita con diferentes materiais e cheíña de comida.
Aquí podedes ver o que fixemos en 2º EI: a cestiña con papel de xornal enroscado e dentro metímoslle fabas, lentellas e pasta.

Grazas de novo familias pola vosa colaboración tamén neste proxecto porque o resultado foi un éxito tanto na recollida de alimentos como de fondos para mercalos dende o cole. E por suposto a aprendizaxe ao redor deste tema mereceu a pena, non vos parece?

              Outro dos proxectos que trae o Nadal é a elaboración de postais de felicitación.
 En infantil sempre facemos un modelo (ou dous) para a nosa familia e outro para enviar a algún neno ou nena de outra clase. O intercambio destas últimas faise o último día pola mañá e de forma un tanto peculiar porque se trata de metelas por debaixo da porta sen que nos vexan, petar nela para avisar e despois saír correndo para non ser vistos. É moi emocionante!!

En 1º e 2º a inspiración para facelas foron os alimentos. Que bonitas!

E as sereas iniciamos un proceso de investigación/creación con algúns alimentos vendo as súas posibillidades plásticas.

 Para as familias este ano a clase das sereas fixo unha felicitación en 3D con material de refugallo 100%.
A silueta do nosos brazo fixo de molde para a árbores en cartón que despois enfeitamos con anaquiños que sobraron de outros traballos e a silueta de nós mesmos coa mensaxe de Nadal.       A que son chulas?



 Estas son só algunhas mostras da parte plástica do proxecto "Nadal" pois como é xa tradicional de novo os xoguetes co material de refugallo, os adornos para a árbore, adornos para as aulas e corredores, preparamos os traxes para a actuación..... (Upss, esto será outra entradiña....)

De momento deixámosvos con esta parte da nosa creación pero...queda moito que contar!!! esperámosvos aquí!

Maxia!!! de papel vello a papel novo!

Xa fai un tempo que o fixemos, pero non queriamos deixar de compartir con vós esta actividade que fixemos as nenas e os nenos da Clase do Sol que tanto nos impactou.

Na aula temos dous cubos do lixo: un para o papel e o outro para os outros resíduos. Cando vimos que o cubo do lixo do papel estaba moi moi cheo pensamos que poderiamos facer con el, porque xa sabedes, no cole todo pode ter un segundo ou mesmo un terceiro uso. Falamos que nas nosas casas tiramos o papel no contenedor azul e que despois o levan a un lugar onde o comverten outra vez en papel pero....non eramos quen de imaxinarnos tal proceso, polo que decidimos pedirlle axuda a Elia.

Ah!! Elia é a profe que máis sabe de reciclaxe e conservación da natureza e encantounos compartir unha mañá na aula con ela. Grazas Elia!!
E con ela inciamos o proceso:

1º-Picamos en anaquiños ben pequechos os papeliños




2º-Botámolos nunha tina de auga quentiña ben grande e batímolo con esa SUPERXIGANTE batidora. UAUE!!! era enorme e fixo desaparecer nun tris os papeliños e converteunos en masa de papel.



3º-Coa axuda duns bastidores iamos sacando un pouco de pasta de papel e escurríndoa para logo, con unha baeta absorver a maior cantidade de auga e que quedase só a pasta.



4º- Seguinte paso supermáxico: Elia colle a baeta coa pasta e pegada......a coloca sobre o cristal da ventana e.....tacháaaaaaaaaaan!!!! un papel cadradiño ben ben lindo!!!!



Mirade as nosas caras que o din todo!


Unha vez secos os sacamos con moito coidado e...a darlles uso!!!

Nós utilizámolos para facer un agasallo no día Internacional da Muller, 8 marzo, para as mulleres que nós consideramos as máis importantes : as nosas mamás.

Preparando o Nadal nas aulas

Ao longo de todo o mes de decembro estivemos a preparar con moito agarimo o Nadal nas tres aulas.
Por unha banda rematando os traballos do trimestre para levalos á casa e poder compartilos coas nosas familias. Encántanos sentar a miralos e remiralos unha e outra vez, explicar o que fixemos en cada un deles, como o fixemos e o ben que nos sentimos véndonos capaces de facer cada día máis cousas e de maneira cada vez un pouquiño máis autónoma.
E para poder transportar estes estupendos traballos decidimos facer unhas bolsiñas con diferentes técnicas pero as tres con materiais de refugallo un pouco mais duradeiros, xa que o obxectivo é podelas reutilizar ao final de cada un dos tres trimestres para transportar os traballos e unha vez rematado o curso podelas utilizar a cotío: para a merenda, para saír de paseo coas nosas cousas ....en fin, seguro que xa lle iremos buscando un sin fin de utilidades.

Os nenos e nenas da clase do Sol utilizaron mostras de teas (grazas Gloria xa sabes que nos dan moito xogo) e déronlles forma de mochila. Mirade que guai:


Na clase dos Tigres variou o deseño pero o material é o mesmo...e como locen!


E os nenos e nenas da clase dos golfiños seguindo co proxecto África, quixeron imitar as teas que as mulleres Mauritanas utilizan para cubrirse e tinguiron camisetas vellas que había pola casa.


E quedaron relamente chulísimas verdade??


Para felicitar o Nadal fixemos ademais das postais inspiradas en África que xa vos ensinamos aquí outros modelos para felicitar aos nosos compañeiros e compañeiras. Este ano tocounos trocar postais cos rapaces e rapazas de 1º bac. O troco de postais é xa unha tradición no cole que nos encanta a todos e todas independentemente da idade. O último día de cole, pola mañá, buscamos ao grupo que nos toca e sixilosamente achegámonos á aula para meter as postais por debaixo da portiña e despois de petar con ganas nela saír correndo para que non nos descubran. Para nós é realmente emocionante, non só envialas senón tamén recibilas do mesmo xeito.
Estes foron os modelos:


E seguindo na liña da reutilización de materiais, como todos os anos tamén, fixemos adornos para as nosas árbores de casa...



.... e os xoguetes que coma sempre saen miles de versións. Con este e outrso traballos xa sabedes que intentamos buscar alternativas e concienciarnos sobre a redución do consumo e tame´n dos resíduos, ademais de fomentar a creatividade e recuperar o valor perdido do xoguete sen pilas, artesanal e feito por eles mesmos. Mirade que xeniais:

Os nenos e nenas da clase do Sol fixeron uns Robots moi orixinais pero non temos fotos.
Os nenos e nenas da clase dos tigres fixeron estes xoguetes variados:





E tamén fixeron estes Monicreques de calcetín na clase dos golfiños. A idea sacámola de aquí, un sitio moi recomendable e con unha chea de ideas xeniais.:





Estas son só algunhas das cousas que fixemos e aprendimos. Outras moitas están en cada un de nós despois do vivido estes primeiros tres meses tantas e tantas experiencias ...e os que nos tedes pretiño irédelas vendo a pouquiños.


.....aínda quedan cousiñas que contarvos ........seguide atentos e atentas.

Ah!!! e que teñades unha boa despedida e entrada de ano! Bicos a todos e todas dende a pequena escoliña de Galén.