Visita de Fredo Fox

Aos nenos de nenas de 1º, 2º e 3º de  EP visitounos Fredo Fox. Estaredes pensando... e quen é Fredo fox?  Pois un raposo verde, moi simpático e viaxeiro, e tamén moi falador!

Amosounos vídeos de nenos e nenas coma nós, pero que vivían moi, moi lonxe, en Hispanoamerica, e contounos as cousas que tiñan, e as que non tiñan.
Tamén nos falou dos dereitos de todos os nenos e nenas, e do importantes que son todos eles.

Grazas a Unicef e a súa presidenta  Myriam Garabito, a  Eduardo e Antonio por 

darnos a coñecer  como viven outros nenos e nenas e facernos pasar un momento ben agradable.

E moitas, moitas grazas a Fredo Fox por facernos partícipes de outras realidades.

Proxecto Os Volcáns. Visita de Santi

Na clase das Águias iniciamos un proxecto novo co inicio do trimestre e estamos a investigar sobre os volcáns, tema que nos apaixona e motiva.
 Coma sempre, comezamos o proxecto coa información que nós mesmos fomos traendo da casa: libros, debuxos, imaxes... e descubrimos moitas cousas novas sobre este fenómeno que é tan fascinante coma perigoso! Pero as mentes inquedas seguimos querendo máis e por iso acordamos convidar a  un experto na materia para que compartise con nós os seus coñecementos... o noso amigo Santi, xeólogo e profe de bioloxía e xeoloxía dos maiores.
Veu unha tarde e contounos  un montón de cousas sobre os volcáns, os  diferentes tipos que existen, como se producen e por que, as súas partes... algunhas cousas xa as sabiamos do noso primeiro traballo de busca e clasificación de información e... deixámolo abraiado cos nosos coñecementos sobre o tema!

Tamén nos amosou os tesouros que se poden atopar na súa clase:  trouxo rochas volcánicas de varios tipos e falounos das súas carácterísticas e propiedades: porosidade, peso, tamaño...Encantounnos poder ademais tocalas e comprobar nós mesmos as súas cualidades. 

As Águias queremos darlle moitísimas grazas a Santi pola súa visita que nos resultou moi interesante, sorprendente (poder mirar as rochas foi xenial) e divertida!
 E seguide atentas e  atentos ao blog porque o noso proxecto segue en marcha e iremos compartindo con vós todo o que vaiamos descubrindo e algún que outro experimento!!!

APRENDENDO A RELAXARNOS

 A semana pasada as nenas e nenos de 1º E.P. aprendemos a relaxarnos con Verónica,  e tamén coa axuda dun amigo moi agarimoso, para o que tivemos que buscar un nome.

Primeiro tivemos que aprender a respirar profundamente. Para iso servía o noso amigo!...colocado na barriga dicíanos se o estabamos a facer ben. Tiña que subir e baixar ao ritmo da nosa respiración.

Moi, moi  importante estirar todas as partes do corpo, dende os pés ate a cara, dándonos unha aperta a nós mesmas, para estirar tamén os brazos.

Coa aquela música tan suave case nos quedamos durmidos!!

O máis sorprendente foi que cado nos levantamos sentiámonos tranquilas e tranquilos e tamén contentos. E o máis importante que nos ía axudar a traballar concentrados e con serenidade.

Grazas Vero.

Unha pianista e un guitarrista moi especiais

Neste segundo trimestre tivemos unha visita moi especial. Viñeron a visitarnos Ignacio o irmán de Alejandra, da clase das sereas, e Carmen a irmá de Cayetana da clase das fadas.  

Os dous levan moito tempo tocando a guitarra e o piano na Escola de Música Cantarela e quixeron vir a compartir con nós todo o que saben sobre estos instrumentos, que é moito. 

Aprendemos un montón de cousas e descubrimos como é o piano por dentro. Non podiamos imaxinar que dentro da caixa de resonancia puidese haber tantas cousas.

Tamén  viñeron os seus compañeiros e compañeiras Natalia, Tadeo, Aina, Lucía Pinilla e Lucía Penas. Entre todos inventaron un conto que falaba de Pepinillo e Félix, unhas personaxes moi especiais que nos axudaron a descubrir os segredos do piano e a guitarra. Tamén estiveron tocando os seus instrumentos. Tocan moi 

 ben!!!!

   

E logo como non podía ser doutro xeito  deixáronnos probar a nós. 

 

 Foi unha tarde moi chula. Graciñas a todos e todas pola visita.

Almorzos saudables

O pasado venres as nenas e nenos de 1º e 2º de E.P., tivemos un almorzo especial. Pablo amosounos o importante que é almozar ben para obter enerxía para correr, pensar, xogar etc, etc.

Que é iso de almorzar ben?- preguntamos nós. Descubrimos que non era tomar bollería, senón, froitas, cereais, zumes, lácteos. Bueno, algún croissant de cando en vez non fai dano.

Ademais de aprender moitas cousas tamén almorzamos. Na mesa había alimentos de moitas cores, mandarinas, plátanos, iogures, pan, cereais, leite, mel, realmente estaba moi bonita .. Probamos de todo e encantounos. Cando saímos ao patio iamos cheos de enerxía e con moitas ganas de xogar.

Un músico e "mestre" especial... Miguel!!!!

Estamos a piques de comezar a preparar o Entroido e entre tanto tamén acontecen cousas moi especiais. Unha desas cousas foi a visita dun dos nosos compañeiros e amigos do cole, Miguel, o irmán de Emma da clase dos golfiños. Nós xa sabiamos que era un rapaz moi divertido e simpático pero do que non sabiamos nada era que coñecía tantas cousas ao redor dun instrumento, o violín. Foi unha sorpresa para nós contar coa visita de Miguel xa que nos contou un montón de segredos sobre ese instrumento que tanto o apaixona e sobre o que tanto sabe. Debe estudar moito para saber todo o que nos ensinou.

Non podiamos deixar de escoitalo ...

Explicounos como se lle pon resina ao violín e que función tiñan algunhas das súas partes ...

E tamén nos deixou probalo...

Ao final pedímoslle que nos tocara algo ... Que pasadaaaaaaaa!!!! Que ben tocaaaaaa!!!

Foi unha tarde moi especial.

Moitas grazas Miguel!!!