Día de Rosalía

Hoxe celebraría Rosalía de Castro o seu 179 aniversario.

E nós queremos facerlle dende aquí a nosa homenaxe recordando un traballiño que fixemos os nenos e nenas de Infantil no 2013.
Aquí podedes ver a entrada daquel momento, e este é o video.
Un proxecto ben bonito para unha artista de todos os  tempos!

Xornadas da cultura 2015

Como cada ano, este mes de Maio está a ser un mes cheíño de cousas bonitas e descubrimentos, festa, literatura, imaxinación, emocións....pois nel celebramos as xa tradicionais Xornadas da Cultura, unha chea de actividades que comezan o día 23 de Abril Día internacional do Libro, e rematan ao redor do día das letras Galegas coa nosa festiña dos Maios. Así que en infantil iniciamos as xornadas con unha visita á Biblioteca Nodal de Lugo para celebrar o Día do Libro.
Alí recibiunos Sabela, a bibliotecaria. Ela contounos varios contos e despois ensinounos como funciona a biblioteca, onde puidemos escoller libros para ler alí nun espazo especialmente preparado para nós.
Tamén nos fixo entrega aos nenos e nenas que aínda non tiñamos, do noso carné de lectoras e lectores co que poderemos ir coas nosas familias e coller emprestados libros, revistas, pelis e ata música.

Na aula fixemos tamén uns marcapáxinas para cando leamos pola noite deixalos na páxina que lemos e retomar á noite seguinte.

Na calse dos caracois como estamos inmersos no proxecto dos peixes, decidimos inspirar a nosa creación na obra "O peixe dourado" de Paul Klee. Aquí podedes ver algunha cousiña do artista.

Na clase dos dinosaurios lanzámonos a coser, e con retalliños de teas de refugallo fixemos estes estupendos marcapáxinas.

Ademais cada un de nós trouxo da casa o que escollemos como "O noso libro favorito" para poder compartilo e ler coas compañeiras e compañeiros. Como nos gusta ler!!

Este ano as xornadas da cultura tiveron como eixe central o papel da muller na lliteratura. En todos os cursos do cole, dende Infantil ata bacharelato fixemos investigacións acerca do papel das autoras, as súas obras e historias. 

En infantil e 1º de EP quixemos coñecer a unha escritora galega que fai libros para pequechos e que ademais é unha grande contadora e actriz. Ela é Paula Carballeira (da que xa coñeciamos algúns contos como "Mateo"). Desta volta traballamos co conto "Paco", un ratiño que viaxa á Lúa pensando que é de queixo fresco. 

Limos o conto e fixemos un mural entre todos e todas. Os nenos e nenas de 1º EP e 3º EI reescribimos o conto e expuxémolo no corredor.

Outro dos proxectos interesantes que iniciamos nestas datas é o "Libro viaxeiro". Trátase dun libro ....baleiro!! non ten texto nin ilustracións e a nosa misión é levalo á casa (de aí que sexa viaxeiro) e coa axuda das nosas familias escribir a historia. Cada día un de nós ten que ler o escrito e continuar a historia. 

É un proxecto moi divertido e importante para nós, pois todas aquelas cousas que fagan partícipes ás nosas familias nos encantan e fomentan esa colaboración familia-escola taaaan importante.

Agora tócavos opinar a vós familias!!! que vos pareceu??

De momento deixámosvos aquí a foto das portadas dos dous libros pois aínda andan de viaxe enchéndose de palabras e historias máxicas. En canto  rematemos contámosvos.

As Xornadas deste ano foron moi intensas como vedes pero...aínda queda a festiña dos Maios. Seguide atentas e atentos!!!

Contacontos en Campo Castelo

Olaaa!!!

mañá venres 16 de maio ás 18:00 e dentro das actividades que Galén organiza no "Mes da Cultura", poderedes gozar na compaña de Zampacontoz, da música e os contos na Plaza do Campo Castelo onde temos unha oficina de información do cole.

Animádevos e invitade a amigos, familia, veciños.....Será unha tarde chea de MAXIA!!!

Xornadas da cultura III: ábrese o telón!!

Como xa vos contamos aquí, e aquí, o mes de Maio todo o cole o adicamos á homenaxe da cultura en todas as súas manifestacións.

Os nenos e nenas de 1º e 2º de Primaria fixemos os nosos proxectos centrándonos no teatro e na poesía, mirade mirade:

Os nenos e nenas de 1º de E.P. rematamos a Semana da Cultura representando dúas obras de teatro: "A tartaruga que quería durmir" e "El pato con botas". 

Todo comezou lendo estes libros, gustáronnos tanto que pensamos que se podían converter en teatro. Decidimos quen eran as personaxes e que decía cada un deles, se iamos necesitar un narrador, ou narradora para que fora contando a historia e tamén miramos que obxectos necesitabamos para as obras. 

Unha vez decidido isto, mans á obra. 

Memorizamos o texto e ensiamos os xestos, o ton de voz que tiñamos que poñer, onde tiñamos que situarnos. Ensaiamos moitooooo! Cando xa estabamos preparados e preparadas pensamos que estaría ben facer unha invitación para as mamás e papás e tamén un resumo para que souberan de que trataban as obras e quen eran as distintas personaxes. 

Chegou o día!

 "El Pato con botas"

     "A tartaruga que quería durmir"

 

Os nenos e nenas de 2º de Primaria preparamos un recital poético coas nosas primeira creacións poéticas. Pasámolo moi ben e cremos que non só gozamos nós senón tamén todos/as os que nos acompañastes

Como o fixemos? pois con moito traballo para que todiño saíse ben. 

Primeiro lemos un montón de poesías. Analizamos a súa linguaxe, os sentimentos, os recursos estilísticos... "La canción del pirata" foi unha das nosas preferidas. Comprobamos tamén as diferencias entre prosa e poesía e "lanzámonos" á busca de palabriñas máxicas, especiais, bonitas,... no diccionario. 

Unímolas a adxectivos e fixemos comparacións. Logo, coma se fose un crebacabezas, encaixámolo todo para que rimase e... o resultado foi xenial!!  E quixémolo compartir coas nosas familias e compañeiros e compañeiras nun emotivo acto literario.

 

Xornadas da cultura II: homenaxe a Rosalía.

Esta é a particular homenaxe que os nenos e nenas de Infantil quixemos facer a Rosalía de Castro no 150 aniversario da publicación de Cantares Gallegos.

 Nas aulas traballamos o poema por estrofiñas, aprendémolo, recitámolo e quixemos facelo máis visual axudándonos coma sempre de materiais de refugallo.
Falamos de Rosalía como unha muller adiantada ao seu tempo e fixemos esta composición plástica inspirándonos en Andy Warhol.
 Despois gravamos o poema no estudo de gravación do cole e contamos coa colaboración como técnico de son do noso compañeiro Donar Rivas de 3º ESO.Grazas Donar!!!

 Este video é o resultado de todo o noso traballo en colaboración grandes e pequenos. A música que completa a presentación é unha peza incluída no traballo "Nordestinas" (Guadi Galego, Ugia Pedreira e Abe Rábade), moi moi recomendable para escoitar na casa...non o dubidedes!

Xornadas da Cultura I: Semana do Libro

O mes de maio é o Mes da Cultura no cole Galén con unha chea de actividades en todos os cursos:  poesía, teatro, música.... Pero ímosvos contando por partes, estade atentos ao blog!

SEMANA DO LIBRO
Os nenos e nenas de Infantil iniciamos as xornadas o día do libro, como xa é tradición, o pasado 23 de abril, cunha visita á Biblioteca Nodal de Lugo. Alí estaban a esperándonos  Conchita e Pepiño para contarnos como funciona unha biblioteca e coñecer un pouquiño os segredos que este lugar máxico agocha.

Pepiño contounos como escoller os libros mirando os pegotes de diferentes cores e debuxos que teñen no lombo e Conchita fíxolles entrega aos nenos e nenas da clase das Fadas do seu carné de primeiros lectores e lectoras, para que así poidan gozar do préstamo de libros, cds, revistas, pelis etc....

 Despois Conchita ensinounos como están as zonas divididas en función das idades e puidemos gozar da lectura de contos no espazo especialmente deseñado para os nenos e nenas coma nós.  

 Antes de marchar escollemos cada un un libro en préstamo co carné do cole para levalos ás aulas e podelos contar ao longo destes días. Na hora de conto puidemos ollalos e compartilos, lelos e escoitalos e viaxar así ao mundo da fantasía ao que a lectura nos transporta. 

 E como cada un de nós ten un ou varios libros favoritos na casa, quixemos traelos ao cole para compartir e ademais fixemos unha exposición con eles e cos marcapáxinas que en cada aula deseñamos. 

 Na clase das fadas fixemos uns marcapáxinas con material de refugallo, pintando con acuarela e adornando con flores feitas de restos de papel de parede! e quedaron moi moi chulos.

 Na clase dos leóns, como estabamos co proxecto da primavera, colgamos nun laciño varios bechiños e 

 floriñas do campo

.  

 E os nenos e nenas da clase das Sereas fixemos dous modelos: como estabamos co proxecto "Casas" fixemos unhas casiñas reutilizando tamén papel de parede e teas. E tamén fixemos estes orixinais "Comefollas"

.  

Tamén para esta ocasión especial contamos coa colaboración das familias. Desta vez foi Marta, a mamá de Isaac, a que quixo compartir con nós un ratiño de literatura da man de Juan Ramón Jimenez. Leunos algúns dos pedaciños da fermosa obra "Platero" e a nós entusiasmounos. Como dixo un de nós referíndose á poesía, aquí tamén as palabras parece que cantan. Grazas Marta por compartir con nós este momento de lectura.

 

Esta foi a primeira parte desta intensa actividade que nos traen as xornadas da cultura cada ano.

 En breve teredes a segunda parte....

Verán en Lugo

Xa rematou o curso siiiiii!!!! e con el chegan momentos para gozar da familia, da area e a auga, dos xogos con outros nenos e nenas, das viaxes e... en fin, uns días para gozar de novas aventuras e experiencias.
 Nós tivemos un curso moi moi intenso e gozamos moito das actividades dentro e fóra do cole, compartindo emocións, sensacións e novas experiencias cos nosos compis e cos nosos profes. Bueno, e tamén con vós, familias e este curso tamén foi moi enriquecedor grazas á vosa colaboración e confianza no noso  proxecto pedagóxico. Grazas, foi un curso xenial!

Dende aquí queremos recomendarvos algunhas ofertas culturais da cidade para este verán.
Xa sabedes que o que as nosas profes recomendan que fagamos nestes dous meses é gozar da familia, da natureza, das bibliotecas e lectura de miles de contos e nos recomendan que asistamos a todos aqueles eventos culturais (música, teatro, contacontos, danza ....) que contribúan a aumentar e enriquecer a nosa intelixencia cultural.
 Aquí tendes algunhas propostas, esperamos vervos nalgunha delas!
 Programa Cultura Aberta 2012

  E o Blog tamén se vai de vacacións, así que ....vémonos en setembro!!!!!

 BICAZOSSSSSS!

Festa dos Maios 2012

Case a piques de rematar o mes de maio, o mes das flores e da chegada do bo tempo que nos fai sentir que si que estamos en primavera, celebramos a tradicional festa dos Maios dentro tame´nd as actividades das "Xornadas da cultura" que cada mes de Maio vimos celebrando.  Coma sempre, entre todos os nenos e nenas de primaria construímos un maio cónico con xestas, fiúncho, fientos, laranxas e flores. Este ano en lugar de ovos quixemos darlle un aire diferente e adornámolo con decoración de papel e formas xeométricas que aportaron os nenos e nenas de 6º EP. Nós aportamos os ramiños de flores que coas nosas familias preparamos con flores silvestres e quedounos moi fermoso, xa vedes.
O venres pola tarde xuntámonos os nenos e nenas de Infantil e 1º ciclo de Primaria para festexar esta festiña tan nosa e da que tanto gozamos. E cantámoslle claro!!!
 Os nenos e nenas de Primaria cantáronlle unha canción recollida en Carnota que tradicionalemnte cantaban as Maias (só nenas) vestidas de branco e enfeitadas con lazos e coroas de flores e que levaban uns arcos tamén floreados.
 En infantil aprendemos un maio da Illa de Arousa que adaptamos un pouquiño á nosa realidade máis cercana cambiándolle a primeira frase. Aquí deixamos as copliñas para que cantedes con nós na casa:
  A toda a xente de Lugo
cantamos de corazón
vinde ver o noso Maio
 que fixemos para vós

 O Maíño Maio
é moi pillabán
 e quere que lle dean os cartos na man (bis)

 Para facer este Maio
tivemos que ir a buscar
os fiunchos e as flores
 á horta do Cantalán

 Veu o Cantalán
cunha escoba vella
virounos o maio e dounos con ela (bis)

Ao longo de toda a semana estivemosa preparar a festa, investigando as súas orixes, as distintas maneiras de clebralo e recordando as cancións aprendidas outros anos. E por suposto preparando as coroas de flores que este ano foron de papel de seda e facendo unha reinterpretación do Maio para darlle cor ao noso corredor. E este ano quixemos facer unha interpretación picassiana do Maio e ademais quixemos colocalo dunha maenora un pocuo máis orixinal. Xa vedes na foto: bandas colgadas do teito con fllores cubistas feitas
con papel de xornal pintado.

  E cada ano seguiremos recuperando a tradicióne reinventando e recreando a súa imaxe. Aquí podedes ver o que fixemos o curso pasado.

Visita ao CENTRAD

O pasado venres estivemos de visita no Centro de Artesanía e Deseño e alí puidemos ver e ata tocar instrumentos antigos, os traxes que fai moitos anos vestían en Galiza homes, mulleres, nenos e nenas e fixemos xogos para atopar as diferentes pezas de ourivería que alí teñen.
Por todas partes cousas interesantes e que nunca antes viramos!
Xa dende o momento de entrar atopámonos cun batuxo..... aínda que o nome nos pareceu un tanto raro pronto adiviñamos entre todos e todas para que serviría.


Despois, coas nosas gafas máxicas tiñamos que buscar pola exposición de ourivería as diferentes pezas que se nos ensinaban en papel....e foi difícil pero tamén o conseguimos!



Tamén visitamos o obradoiro de carpintería onde nos ensinaron diferentes tipos de madeira, diferentes ferramentas para traballala e diferentes pezas que alí fan.


E tamén estivemos nun lugar moi especial: a reprodución do Pórtico da Gloria onde fixemos xogos de busca de diferentes animais nunha sala chea de zanfonas e instrumentos antigos do máis especiais. E aquí por suposto acordámonos moito de David e de todo o que nos ensina ao redor dos instrumentos...canto sabiamos xa!!!


E tamén puidemos tocar de verdade este instrumento que funcionaba metendo aire con un pedal e que grazas ás diferentes teclas producía uns sons ou outros dependendo do tubiño polo que saía o aire....e por suposto o que máis molaba era busacr os máis graves e os máis agudos....os máis estrondosos sons sempre son os que máis nos molan....jejejeje.


E por suposto visitamos tamén a exposición do Traxe Galego. Alí puidemos ver os diferentes tipos de traxe: de home e de muller, de gala ou de faena, as formas e cores etc....
Agora nas aulas seguiremos investigando ao redor deste tema e xa vos iremos contando.


E...queremos recordarvos que se queredes podedes vir a participar nas aulas compartindo con nós un ratiño lendo un conto, falando da vosa profesión, aportando nalgún dos proxectos iniciados, cociñando con nós etc.... é dicir compartindo un pocuquiño de vós con nós. A experiencia é sempre moi positiva e aos nenos e nenas nos encanta tervos na aula....veña que xa esta a rematar o curso animádevos!!!!

Teatro en Lugo no Nadal

Xa sabedes que tamén dende este blog vos informamos da oferta cultural para os máis pequechos na cidade. Non esquezades visitar de cando en vez o sitios recomendados na coluna da esquerda. Aí podedes atopar moita e moi variada programación cultural infantil en toda Galicia.

Déixovos aquí o enlace ao programa de Nadal da área de cultura do concello de Lugo. Mañá ás 18:30 no Gustavo Freire teremos aos títeres Trompicallo con "O día que chegou unha nube e choveu". Pinchade aquí.
O mércores 28 tamén ás 18:30 non vos perdades a función da compañía Matapiollos que desta volta nos agasalla con "A rebelión do monicreque". Seguro que non vos defrauda porque desta compañía podería recomendarvos calquera das súas montaxes. Mirade aquí.
Consultade aquí o programa de Nadal e xa sabedes: animádevos a participar da oferta cultural da cidade!

Nestes días seguiremos contándovos as cousiñas que fixemos en Nadal.
Seguiremos informandooooooo!!

San Froilán Miúdo

Este é o nome da programación infantil para as festas de San Froilán, e queremos animarvos a participar delas xa que as festas, ademais de para gozar delas coa familia, as xuntanzas, os paseos e as atraccións, son unha oportunidade para poder gozar aquí na nosa cidade dunha maior oferta cultural con espectáculos teatrais, musicais, circo, danza etc....
Para ver o programa e ir organizando a vosa axenda cultural festeira, premede AQUÍ.
Neste mesmo sitio podedes atopar toda a programación para adultos e...non tan maiores eh?!! porque moitas das actividades que aparecen fóra do apartado infantil seguro que tamén nos poden facer gozar e participar da festa como os pasarrúas, música tradicional, algún concerto.....xa nos contaredes!

E aproveitando esta entradiña sobre oferta cultural, recordade que no menú da esquerda podedes atopar información sobre espectáculos fóra e dentro de Lugo ao longo de todo o ano, que esperamos vos anime participar.
Pasade un bo San Froilán!!!!

Semana da cultura

Queremos compartir con vós algunhas das cousiñas que fixemos na Semana da Cultura, que co gallo do Día das Letras Galegas todos os anos celebramos en todas as aulas do centro.
En infantil limos e creamos poemas, fomos a un contacontos e preparamos a festa dos Maios.

Os nenos e nenas da clase das Landras escollemos a poesía de Uxío Novoneyra xa que nelas puidemos ver elementos da natureza que coñecemos ben e que son cercanos á nosa experiencia cotiá: a choiva, as fontes, os paxaros ....Especial atención adicamos ao poema que vedes na foto, a través do cal traballamos un montón de cousas:
memorizamos o poema, experimentamos coa sonoridade das palabras, como sonan, cales se parecen, que letras recoñecemos nelas, a que outras palabras coñecidas se parecen....e fixemos con material de refugallo unha fonte que sae dunha pedra da montaña. Así de chula nos quedou:

Ás estrelas encantounos a poesía de Antonio García Teijeiro "O rato e maila lúa" porque nos fixo gracia que o rato se namorase da lúa e ao mesmo tempo tamén nos pareceu bonita xa que nos amosa que podemos querer a alguén moi distinto a nós. Traballamos tanto a temática do poema coma a súa composición e así descubrimos que o poema se dividía en tres partes e tamén aprendimos a rimar lúa con rúa, rir con durmir... Logo disto preguntámonos se todas a vogais poden levar til, e grazas ao poema chegamos á conclusión de que sí. Coa elaboración deste mural repasamos as letras que coñecemos, descubrimos o nome doutras e pronunciámolas, atopándolles semellanzas con nomes que xa coñeciamos. A continuación podedes ver a nosa obra de arte, agardamos que vos guste tanto coma a nós.


AS MEDUSAS traballamos o poema do autor ferrolá Antón Cortizas chamado Un home de Lugo. Antón Cortizas obtivo  o premio Merlín en 2001 e en tres  ocasións o premio O barco de vapor. Este poema fala de amor, de finais felices, cun final un pouco inesperado pero frecuente para as persoas que se adican exclusivamente aos demais.  Nós xa sabemos escribir e puidemos, ademais de ler e memorizar o poema, escribir os versos e representar de xeito autónomo o que nos suxiren.  A poesía sempre nos fai soñar e crear imaxes que os libros ilustrados nos dan feitas.



O xoves fomos a un contacontos ás Termas e contáronnos tres contos divertidos e emocionantes. Nun deles a contacontos, con recortes de xornais foinos facendo as personaxes que formaban parte do conto: unha ratiña, un sol, unha nena... Logo seguimos coa historia dun porquiño moi listo ao que todos querían comer pero que sempre se saía coa súa e ate lle daban masaxes! E para rematar non só nos contou un conto senón que nos fixo partícipes del transformámonos por un anaco en princesas, reis e outras personaxes curiosas e fascinantes que nos fixeron sentir coma os actores e actrices por un día.




E como fin de festa celebramos, como todos os anos, a festa dos Maios xunto cos rapaces e rapazas de Primaria e primeiro ciclo de Secundaria.
Entre todos e todas construímos o Maio cónico: uns recolleron e colocaron xestas, outros ovos e laranxas, outros fientos e fiuncho e nós recollemos flores dos arredores e fixemos ramiños para enfeitar o nosos maio que quedou así de ben.



Toda a semana estivo adicada aos Maios: falamos da tradición popular, do significado, das músicas e cancións, dos adornos e traxes....
Preparamos as coroas de flores, desta volta fixemos unha pequena recreación das mesmas; con plastilina de cores e papel de seda fixemos estas flores tan orixinais... a que parece que son de comer!!!


E inspirándonos nunha obra de Andy Warhol fixemos este fermoso maio cónico para enfeitar o noso corredor e aportando así a parte máis actual á nosa tradicional festa.



Aprendemos a canción do Maio de Mondoñedo e o Venres cantámola acompañándonos de claves e cun pequeno baile ao redor de dous maios humanos, emplazámolo para que volvese o maio para o ano que vén e poder pasalo de novo así de ben!!!