Tres, dous, un....arranca o entroido!!!

Hoxe iniciamos a semana de actividades de Entroido co obradoiro de caretas.
Os nenos e nenas da clase do sol fixemos un ratiño/a con teas que lle deron unha textura amorosiña, os nenos e nenas da clase dos tigres como non fixemos a cara dun tigre e os golfiños convertémonos en superheroes e superheroínas.
Quedáronnos ben chulas non si?









E tamén inauguramos o rincón de disfraces nas aulas. Xa sabedes, con calquer trapiño imaxinamos que somos un sin fin de personaxes.



A semana promete ser do mellor. Como todos os anos faremos os diferentes obradoiros: maquillaxe, cociña e preparación de disfraces combinado co proxecto de investigación sobre a Prehistoria e os ensaios da posta en escea que terá lugar o Venres ás 15:30 no pavillón do cole, nunha montaxe na que entre todos os cursos tentaremos explicar a historia da humanidade nas diferentes épocas. Non a perdades, será unha superfesta!!!

Un músico e "mestre" especial... Miguel!!!!

Estamos a piques de comezar a preparar o Entroido e entre tanto tamén acontecen cousas moi especiais. Unha desas cousas foi a visita dun dos nosos compañeiros e amigos do cole, Miguel, o irmán de Emma da clase dos golfiños. Nós xa sabiamos que era un rapaz moi divertido e simpático pero do que non sabiamos nada era que coñecía tantas cousas ao redor dun instrumento, o violín. Foi unha sorpresa para nós contar coa visita de Miguel xa que nos contou un montón de segredos sobre ese instrumento que tanto o apaixona e sobre o que tanto sabe. Debe estudar moito para saber todo o que nos ensinou.

Non podiamos deixar de escoitalo ...

Explicounos como se lle pon resina ao violín e que función tiñan algunhas das súas partes ...

E tamén nos deixou probalo...

Ao final pedímoslle que nos tocara algo ... Que pasadaaaaaaaa!!!! Que ben tocaaaaaa!!!

Foi unha tarde moi especial.

Moitas grazas Miguel!!!

Invitación obradoiro maquillaxe

Como todos os anos por estas datas, cando se achega o Entroido, comezamos a preparar a festa e actividades propias da época. Pero non queremos desvelarvos moito, así que só nos queda de momento invitarvos ás familias de toda Educación Infantil e 1º de EP a participar no xa tradicional obradoiro de maquillaxe que faremos o vindeiro martes 14 de febreiro de 15:30 a 16:30 hrs.

Se queredes participar falade coas nosas profes antes deste Venres día 3.

Animádevos que é unha experiencia inesquecible! Podedes ver o ben que o pasamos o ano pasado aquí.

Iniciamos obradoiros internivelares

Como sabedes gustamos de facer cousiñas mesturándonos nenos e nenas de diferentes idades. Este curso, como os outros, temos moitos momentos compartidos entre as aulas de Educación infantil pero tamén cos nenos e nenas de 1º EP.

Dende inicio de curso os nenos e nenas da clase dos golfiños e 1º EP, todos os luns, estivemos a facer dous obradoiros: horto e experimentos e ademais de pasalo xenial aprendimos moitas cousas máxicas.

Agora dende o incio do segundo trimestre tócanos incorporarnos aos tigres e aos soles, e os obradoiros que temos en marcha son : "Horto", "Corpo", "Somos artistas" e "Cociña".

No obradoiro de Horto iniciamos os primeiros traballos para ir preparando a terra e poder sementar. Tamén recollimos a folla e xuntámola para o compost.



No obradoiro que chamamos "Corpo" imos experimentando sensacións do noso propio corpo, a relaxación individual e tamén as masaxes en parellas. Fixemos tamén un taller de apertas que nos deixou un moi bo corpo a todas e todos e gozamos destes momentos de expresión de emocións e compartir cos demais estas xeniais sensacións.







No obradoiro de cociña empezamos polos "Enroladiños de salchicha" que nos saíron requetedeliciosos.





No obradoiro "Artistas", grazas á nosa creatividades e un pouco de maxia, fixemos estes fermosos botes de sales de cores:






E seguiremos ao longo de todo o curso con estes obradoiros nos que ademais de aprender e sentir, gozamos do tempo compartido con outros nenos e nenas de idades diferentes e con necesidades tamén diferentes pero moi moi compatibles.

Os grandes ao cole....

....si, si desta volta tócavos a vós. Pero non só aos papás e mamás senón tamén aos profes.

Estamos a preparar unhas xornadas dirixidas ao profesorado de Educación Infantil, primeiro ciclo de primaria, profesionais da psicoloxía, pedagoxía e todos aqueles interesados e interesadas na educación e desenvolvemento dos máis pequenos e pequenas.
Terá lugar nas instalacións do cole entre o 24 e 26 de febreiro de 2012. Aínda quedan prazas!

A poñente do curso é Yolanda González Vara, psicóloga clínica, formadora en promoción da saúde e prevención infantil e autora do moi moi recomendable libro "Amar sin miedo a malcriar".
Podedes atopar máis información sobre ela aquí.

E para as familias teremos o sábado 24 de 18 a 20hrs un obradoiro teórico vivencial titulado "As emocións infantis e as nosas". Animádevos a vir que de seguro pode aportar moito á crianza dos vosos nenos e nenas. Haberá servizo de gardería!
O prazo de inscrición remata o 6 de febreiro pero non tardedes porque as prazas son limitadas. Pedide información no cole ou a través do teléfono 982 265205, ou en curso@centrogalen.com.