Un martes pola tarde, os dolphins estiveron a facer deliciosos pancakes. Logo de ver un vídeo por internet de como se elaboran, puxémonos a coñecer e a aprender os nomes dos ingredientes (flour, sugar, baking powder, salt, eggs, milk, oil and -very important- chocolate). Feito isto e os grupos, repartimos os utensilios para a súa elaboración... e animámosvos a facelas un día para almorzar ou merendar!!!
Mans á obra: botamos 1 taza de fariña nunha cunca e engadímoslle 2 culleradiñas de levadura en pó. E mesturamos. Incorporámoslle 2 culleradas de azucre e 1/2 culleradiña de sal. E volvemos a remexer. Ata aquí os ingredientes secos.
Por outra banda, noutra cunca botamos 1 ovo e batemos con forza. Engadímoslle 1 taza de leite e 2 culleradas de aceite de xirasol. Batemos todo ben e mesturamos os sólidos cos líquidos ata que a masa sexa homoxénea.
Lista este mestura, botamos un caciño na prancha quente previamente humedecida con aceite e esperamos ata que o pancake amose burbulliñas. Este é o momento xusto para darlle a volta e poñerlle enriba tantas onzas ou gotiñas de chocolate como nos apeteza... e collan claro. Esperamos un 1 minuto ou menos e LISTO. Xa podemos estender o chocolate derretido polo pancake e gozar coméndoo.
Como vedes, pasámolo en grande e gozamos comendo cada un dous pancakes. Que bos que estaban e que ben merendamos!
Por suposto, non nos esquecemos de recoller e limpar todos e todas ao rematar, algo tan importante como todo o proceso anterior. A todos e todas nos gusta axudar e sentir que estamos axudando, colaborando para un ben común. Encántanos que se conte con nós para facer cousas. Sentímonos importantes, como o que verdadeiramente somos.
Veña, agora a probar a facelos na casa e ídenos contando aquí nesta entrada como vos saíron!!!
No hay comentarios:
Publicar un comentario
A vosa participación tamén é importante....contade!!